Vi har fått ny nettstad. Denne nettstaden blir ikkje lenger oppdatert. Du finn oss på statsforvaltaren.no.
Kommunane tar godt vare på skogen
Frå og med 2020 tok kommunane over mynde og tilskot til ordningar rundt skogdrift og skogvegbygging i fylket. Dei har gjort ein god jobb.
Dette innhaldet er meir enn eitt år gammalt. Informasjonen kan derfor vere utdatert.
Publisert 15.12.2020
Tidlegare hadde Fylkesmannen dette ansvaret.
– Det var ei viss skepsis til slik overføring av mynde til kommunane. Men dei har gjort ein god jobb. Også med dei økonomiske ordningane, fortel Åsmund Asper, fylkesskogmeister hos Fylkesmannen i Møre og Romsdal.
15,5 millionar i tilskot
Fylket har passert 12,3 millionar kroner i tilskot til veg og drift i 2020.
– Det finnast framleis pengar tilgjengeleg i kommunane. Dei har rydda i sine eigne prosjekt. Der fann dei midlar etter prosjekt som anten vart mindre enn planlagt, eller ikkje sett i gang. Oppryddinga har fristilt nesten 2,2 millionar. Desse midlane kjem tilbake til kommunanes eiga ramme, fortel Asper.
Då koronakrisa kom i mars, var det gitt ei tiltakspakke gjennom Landbruksdirektoratet for å oppretthalde hogstaktivitet og drift for skogsentreprenørane. Til nå er det tildelt 2,9 millionar i koronatilskot i Møre og Romsdal.
– Det meste er allereie utbetalt, fortel Asper.
Landbruks- og mat departementet har endra frist for å søkje om utbetaling av koronatilskot. Fristen for innrapportering om sluttutbetaling er utsett frå 1. desember 2020 til 1. mars 2021.
Oppsummert i 2020 vil budsjettet for veg- og driftstilskotet, samt ordninga kring korona nærme seg 15,5 millionar kroner i tilskot for skognæringa i Møre og Romsdal.
Positiv effekt
– Betre økonomisk oversikt og auka ansvar i kommunane er positivt. Det viser ei god effekt av overføring av mynde, og synar kor viktig det er med eit fungerande skogkorps i kommunane, seier Asper.
Han understrekar at det framleis er fleire utfordringar kring ny forvaltningsordning. Dette krev mykje dialog og kursing kring datasystem og planlegging/dialog mot skognæringa.
– Men, vi er altså på god veg. Kommunalt tilsette med kompetanse på skog er saman med ei aktiv skognæring effektivt og bra for skogforvaltninga i fylket, seier Åsmund Asper.
Taubanedrift med koronatilskot på Averøya, november 2020.
Foto: Dag Bjerkestrand